6 yoshli millioner qizaloq

Amerikalik jajji qizaloq – «Toddlers & Tiaras» shousining sobiq ishtirokchisi Izabella Barrett olti yoshida millionerga aylandi. U bir necha go`zallik tanlovlarida g`olib chiqib, o`z biznesini ham yo`lga qo`yishga muvaffaq bo`lgan.

Izabella ilk marta onasining qistovi bilan eng kichiklar uchun go`zallik tanlovida ishtirok etib,  g`oliblikni qo`lga kiritgan. Bu mitti qo`g`irchoqning g`alabaga erishishi uchun qimmatbaho ko`ylaklar, makiyaj va turmaklarga 50 ming AQSh dollari miqdorida mablag` sarflangan. Jajji yulduzning onasi o`z urinishlari zoe ketmay, qizi g`olib bo`lganidan juda baxtiyor.

6 yoshda katta omadga erishgan qizaloq o`z shaxsiy pardoz vositalari va zargarlik buyumlari liniyasini ham ishga tushirdi. Omma uning tashabbusini qo`llab-quvvatlagan holda, Izabella Barrettdan lab uchun bo`yoqlar, bilaguzuklar kabi pardoz vositalari va taqinchoqlarni jon deb xarid qilmoqda. Bu esa jajji yulduzga ko`plab daromad keltirmoqda.

«Men juda baxtiyorman. Men superyulduzman. O`z biznesimga ega bo`ldim. Bu haqda boshqalar faqat orzu qilishlari mumkin», – deydi jajji go`zal Izabella.

Izabella o`z go`zalligi va kuchiga shu qadar qattiq ishonadiki, atrofida hech qanday raqobatchini ko`rmaydi. Onasi esa qizining xulqi buzilishidan havotirda: «Qizim Britni Spirsning yo`lidan ketishidan juda havotirdaman. Hozirning o`zida Izabella o`zini go`yo superyulduzdek tutmoqda.  Eng mashhur mehmonxonalar xizmatidan foydalanadi. Men esa uni imkon qadar to`xtatishga urinyapman», – deydi ona.

Xabarlarga qaraganda, Izabella Brodveydagi har bir chiqishi uchun 10 ming dollar oladi. Kiyinish uchun do`konlarda katta-katta xarajatlar qilmoqda. Aytishlaricha har kuni ovqatlanishining o`ziga 2000 dollar sarflar ekan.