MTS yana 3 oy ishlamaydi

2012 yilning 30 iyulidaToshkent shahar xo`jalik sudi “MTS-O`zbekiston” mobil aloqa operatorining litsenziyasini to`xtatish muddatini yana 3 oyga cho`zish to`g`risida qaror qabul qildi.

Qaror “Alohida faoliyat turlarini litsenziyalashtirish to`g`risida”gi O`zbekiston Respublikasi Qonunining  22-moddasiga binoan, shuningdek 2000 yil 22 noyabr da Vazirlar Mahkamasi tomonidan qabul qilingan 458-sonli qarori bilan tasdiqlangan Telekommunikatsiyalar sohasidagi faoliyatni litsenziyalashtirish to`g`risidagi nizomning 45-bandiga muvofiq litsenziat tomonidan aniqlangan qonunbuzarliklarni bartaraf etish bo`yicha litsenziya beruvchi organning qarorlarini bajarmaganlik uchun qabul qilindi.

Eslatib o`tamiz, O`zbekiston Aloqa va axborotlashtirish agentligining 2012 yil 17 iyuldagi №19-L sonli buyrug`i bilan MChJ shaklidagi “O‘ZDUNROBITA” XKning 28.07.2004 yili berilgan AA №0000682 seriyasidagi litsenziyasi 10 ish kuniga to`xtatilgandi.

Qayd etib o`tamiz, “O’ZDUNROBITA” XK 2012 yilning  18 va 24 iyulida O`zAAAni buyruqda ko`rsatilgan qonunbuzarliklar bartaraf etilgani haqida yozma shaklda xabardor qilib, tarmoq faoliyatini tiklash maqsadida 28.07.2004 yilda berilgan AA №0000682 seriyasidagi litsenziya faoliyatini tiklash to`g`risida qaror qabul qilishni so`rab, murojaat qilgandi.

Keyingi monitoring jarayonida kompaniya tomonidan O`zAAA buyrug`ida ko`rsatilgan Toshkent shahri va Toshkentviloyatidagi uchta radioreleliniyasi oralig`ining noqonuniy faoliyati deyarli to`xtatilmaganligi aniqlandi.

Aniqlangan faktlar kompaniya tomonidan DAI ko`rsatmalari va O`zAAA buyrug`ini pisand qilmaslikdan dalolat beradi. Bu holatning 46-bandiga ko`ra litsenziat tomonidan litsenziya faoliyatini to`xtatishga olib kelgan harakatlarning bartaraf etilmasligi sifatida kvalifikatsiya qilinadi.

Shu munosabat bilan mazkur litsenziya faoliyatini to`xtatish muddatini 3 oyga cho`zishga qaror qilindi.