Britaniyada daryo tubidan iPhone XR topildi. U suv ostida 10 oy qolib ketgan

Ouayn Devis ismli Buyuk Britaniya fuqarosi internet foydalanuvchilariga yo‘qolib qolgan smartfoni tarixi haqida so‘zlab berdi, deb yozadi Aroged portal.

Ouayn o‘zining iPhone XR smartfonini Sinderford yaqinidagi Uay ko‘liga 2021-yilning avgustida eshkak eshish vaqtida tushirib qo‘ygan. Devisning so‘zlariga ko‘ra, u juda xafa bo‘lgan va smartfonini biror kun topib olishdan umidini uzgan.

Oradan 10 oy o‘tgach devays o‘z egasiga yana butun holda qaytib keldi. 2022-yilning iyunida shaharning boshqa bir fuqarosi daryo tubidan ko‘k g‘ilofdagi qora iPhone XR’ni topib olgan.

Omadli inson telefonni loydan tozalagan, uni quritgan va ijtimoiy tarmoqlarda uning suratini joylashtirgan. iPhone qurigach, yigit uni yoqishga muvaffaq bo‘lgan va blokirovka ekranida apparat egasining oilasi bilan tushgan suratiga duch kelgan. Bu iPhone’ni egasiga qaytarishga yordam bergan.