O`zMTRK qoshida yangi “Navo” hamda “Kinoteatr” kanallari ishga tushadi

O`zbekiston Milliy teleradiokompaniyasi to`rtta yangi telekanalni ishga tushirishni rejalashtirilmoqda. Yangi kanallar hozirda mavjud telekanallar bazasida ochilib, turli yo`nalishlarda faoliyat yuritadi. Shu jumladan, “O`zbekiston” telekanali bazasida “Oilaviy” kanali, “Toshkent” telekanali qoshida musiqiy “Navo”, “Yoshlar” bazasida kino mavzusidagi “Kinoteatr”, “Madaniyat va Ma`rifat” qoshida esa respublikadagi barcha viloyatlar hayotiga oid ko`rsatuvlarni uzatish bilan shug`ullanuvchi “Hududlar” telekanallari paydo bo`ladi.

O`zMTRKdagi manbalarning ma`lum qilishicha, “Toshkent” telekanali bazasida tashkil qilingan musiqiy “Navo” va “Yoshlar” qoshidagi kino mavzusiga bag`ishlangan “Kinoteatr” kanallari 14-noyabr kuni 17:00 dan 23:00 gacha efirga chiqadi. Mazkur telekanallarning barchasi o`z ko`rsatuvlarini raqamli formatda namoyish qiladi.

Ma`lumotlarga qaraganda, “O`zbekiston” telekanali bazasida “Oilaviy”, “Madaniyat va Ma`rifat” qoshida “Hududlar” telekanallarini ishga tushirish ustida ham ish olib borilmoqda.

Eslatib o`tamiz, so`ngi yillarda O`zMTRK qoshida turli telekanallar ko`payib bormoqda. 2013 yilning yanvar oyida “Madaniyat va Ma`rifat” shuningdek “Dunyo bo`ylab” telekanallar va yoz oylarida esa “Yoshlar” telekanali qoshida “Bolojon” telekanali o`z faoliyatini boshlagan.