Bir kunda hayotni o‘zgartirish metodikasi: bu postni allaqachon 169 million kishi o‘qib chiqdi

Amerikalik mashhur bloger va shaxsiy rivojlanish bo‘yicha ekspert Den Kou X tarmog‘ida hayotni atigi bir kun ichida butunlay yangi o‘zanga burish haqida katta maqola e’lon qildi. Ushbu post qisqa vaqt ichida ommalashib, 169 million marta ko‘rildi. 7 mingdan ortiq kishi maqola ostida o‘z fikr-mulohazalarini qoldirdi.

Yangi yil va’dalari nega ish bermaydi?

Maqola avvalida Den Kou ko‘pchilik uchun odat bo‘lgan “Yangi yildan yangi hayot boshlayman” degan va’dalarni qattiq tanqid ostiga oladi va buni shunchaki “ahmoqlik” deb ataydi. Biroq muallif bu gaplari bilan kimnidir kamsitmoqchi emas. Uning aytishicha, o‘zi ham ushbu samarali metodikani ishlab chiqqunga qadar o‘nlab marta maqsadlariga yetolmay, yarim yo‘lda qolib ketgan. Kouning usuli vazn tashlashdan tortib katta biznes qurishgacha — har qanday maqsad uchun birdek ishlaydi va bir necha haftadan keyin paydo bo‘ladigan odatiy tushkunlikning oldini oladi.

Metodika asosi: bir kunni uchga bo‘lamiz

Muallif hayotni yaxshilashni kunni ongli ravishda uchta muhim bosqichga ajratishdan boshlashni taklif qiladi:

1. Ertalab — “psixologik tahlil”: kun boshida 15–30 daqiqa vaqt ajratib, o‘z shikoyatlaringiz, qo‘rquvlaringiz va hayotingizdagi sizga yoqmayotgan jihatlar haqidagi savollarga halol javob berishingiz kerak. Bu jarayon muammolarning asl sababini tushunishga va vaziyatga real ko‘z bilan qarashga yordam beradi.

2. Kun — “avtopilotni o‘chirish”: kundalik yumushlar davomida o‘zingizga turli eslatmalar va kutilmagan savollar bering. Bu sizni odatiy, qoliplangan hayot tarzidan chiqarib, har bir ishni ongli ravishda bajarishga majbur qiladi.

3. Kechqurun — xulosa chiqarish: bunday tartibda o‘tgan kundan so‘ng miyangizda kamida bitta yangi fikr yoki “yorishish” paydo bo‘lishi kerak. Ana shu yangilikni ushlab qolish va uni hayotingizga singdirish juda muhim.

Maqsadlarga “o‘yin” sifatida qarash

Bloger barcha rejalarni uchta darajaga bo‘lishni va ularni video o‘yin formatiga o‘tkazishni maslahat beradi. Bu usul motivatsiyani uzoq vaqt saqlab qolish imkonini beradi:

• Bir yillik maqsad — bu sizning asosiy “missiyangiz”;

• Bir oylik reja — bu “rahbar bilan jang”;

• Kundalik qadamlar — bu oddiy “topshiriqlar”;

• Cheklovlar — ijodkorlikni oshiruvchi “o‘yin qoidalari”.

Den Kouning fikricha, hayotga o‘yin sifatida qarab, uning “topshiriqlarini” bajargan inson o‘z istaklariga tezroq va osonroq erishadi. Bu yondashuv diqqatni bir joyga jamlashga va ishdan zavq olishga yordam beradi.

Odamlar nima deydi?

Ushbu metodika internet foydalanuvchilarini ikkiga bo‘lib yubordi. Ba’zilar muallifning haddan tashqari ko‘p gapirganini kinoya qilib: “Menga hammasini qisqacha tushuntirib ber, butun kunimni maqola o‘qishga sarflamay, 10 daqiqada hayotimni o‘zgartirib qo‘ya qolay”, deb yozdi.

Yana bir foydalanuvchi esa postning 226 ming marta saqlangan postlar qatoriga qo‘shilganiga e’tibor qaratdi: “226 ming odam xuddi men kabi bu maqolani keyinroq o‘qish uchun olib qo‘ydi, ya’ni biz hozirdanoq ishni keyinga qoldirishni (prokrastinatsiyani) boshladik”.

Boshqa foydalanuvchilar aksincha, muallifni qo‘llab-quvvatladi: “Sizga yoqmayotgan hayot haqida chuqur o‘ylab ko‘rish va uni yaxshilashga urinishning o‘ziyoq ajoyib ish!”.

Tanqidchilar esa maqola shunchalik uzunligidan, uni o‘qib chiqishning o‘zigayoq butun bir kun sarf bo‘lishini aytib o‘tdi. Nima bo‘lganda ham, Den Kouning bu yondashuvi millionlab odamlarni o‘z odatlari haqida qayta o‘ylashga majbur qildi.