Xatolar

Hayotingizga kelayotgan noxushliklarda kimni ayblaysiz? Bo`layotgan ko`ngilsizliklarga kim aybdor? Men bir odam haqida eshitgandim. Uning qilgan ishini ko`rib, erinmagan banda deb yuborgan edim. Ammo keyin o`ylab qarasam, u to`g`ri qilar ekan. Nima qiladi, deysizmi? U uyida muhim hujjatlari orasida “AX” deb yozilgan papkani saqlaydi. Bu – Axmoqona Xatolar, degani.

U hayotida, ishida qilgan axmoqona xatolarini o`sha papkada saqlaydi. Qanday xato qilgan bo`lsa, ularni qo`lda o`zi shaxsan yozib, o`sha papkada saqlaydi. Ba`zi-ba`zida muhim qarorlar chiqarishdan oldin, bu xatolarni varaqlab ko`radi. U menga shunday degan edi: «Nega bu narsalarni yozishga vaqt sarfladingiz, deysizmi? Bularni yozishim uchun qanchadir vaqt ketsa ham, kelajakda, qilishim mumkin bo`lgan xatolardan saqlaydi.

Har safar qaror chiqarishdan oldin, mana shu papkani varoqlayman, va qiladigan ishimni yaxshilab o`ylab ko`raman. Yana xato qilib qo`yib, oilam va boshqalarning oldida noqulay ahvolga tushib qolishni istamayman.» U haq gapni aytgan edi. Har birimiz o`tgan hayotimizga qarab, qilgan xatolarimiz haqida o`ylab ko`rishimiz kerak. Bu xatolar doimo ko`z oldingizda bo`lsa, keyingi xatolarning oldi olinadi. Ëshlikda kim ham xato qilmaydi deysiz?!

yillar o`tib, kishi ulg`aygach, o`shanda xato qilganini anglaydi. Hayotida bo`lgan ko`ngilsizliklar xatosi tufayli kelib chiqqanini tan oladi. O`sha paytda balki boshqa birovni ayblagandir. Hech kim xatodan holi emas. Xatto buyuk sarkarda Napoleon ham o`zi haqida shunday degan ekan: «Muqaddas Elena orolidagi jangda mag`lub bo`lishimizga faqat o`zim aybdorman. Mening eng yovuz dushmanim , bu men o`zim.»

Amerika moliya olamida  ko`zga ko`ringan shaxs Xauell haqida bir narsa eshitganman: «U tanishlaridan biriga shunday degan ekan: Mening oilam shanba kuni kechqurunga mening ishtirokimda biror narsa rejalashtirishmaydi. Chunki o`sha kuni kechki ovqatdan so`ng, men xonamga kirib, o`z ustimda ishlayman. Qilgan xatolarim va yutuqlarimni ko`zdan kechiraman.

Shu paytda men o`z-o`zimdan so`rayman, «Bu safar men qanday xato qildim? »» Bu odam moliya olamida ko`zga ko`ringan etuk shaxs bo`lishidan oldin, ishini oddiy sotuvchilikdan boshlagan. Agar siz ham o`zingiz haqingizda, erishgan muvaffaqiyatlaringiz va qilgan xatolaringiz ustida fikr yuritishga o`rgansangiz, xatolar o`z – o`zidan kamayib boraveradi.

Xatto buyuk va mashxur odamlarning ham o`ziga yarasha kamchiliklari bo`ladi. Bilasizmi Benjamin Franklin ham kamchiliklardan holi bo`lmagan. U o`zi haqida fikr yuritar ekan o`zida, 30ga yaqin kamchilikni topadi. Ulardan biri, vaqtini bekor o`tkazish, arzimagan narsalarga hijolat bo`lish, bahslashish va gap qaytarish. Franklin bu kamchiliklarini tuzatmasa, hayotda muvaffaqiyatga erisha olmasligini anglab etgan. U haqidagi ma`lumotlarga qaraganda u ikki yil davomida har kuni o`z kamchiliklari bilan kurashgan.

Bizning ulardan qaerimiz kam?! Biz ham o`z xatolarimizni anglab, keyingi safar shu xatolarni takrorlamaslikka urinsak, bundan ish chiqmaydimi? Siz ham muvaffaqiyatlarga loyiqsiz. Kichkina odamlar arzimagan tanqiddan ham g`azablanadilar. Aqlli va buyuk kishilar bu tanqiddan biror narsa o`rganib oladilar. Shuning uchun atrofingizdagilar sizni tanqid qilishlaridan oldin o`z xatolaringiz ustida ishlashni boshlang. Fikrlaringizni kutib qolamiz.