O‘g‘il, xotin va ona: Bruklin Bekhem to‘xtata olmagan oilaviy drama

Shou-biznes olamida mojarolar va dramalar hech qachon tugamaydi — millionlab muxlislar mashhurlar hayotini diqqat bilan kuzatib boradi. So‘nggi yillarda esa Bekhemlar oilasidagi eng ko‘p muhokama qilinayotgan mojaro — Viktoriya Bekhem va uning kelini Nikola Peltz o‘rtasidagi sovuq munosabatlar bo‘lib kelmoqda.

Uch yil avval boshlangan oilaviy kelishmovchilik hanuzgacha davom etmoqda: mashhurlar bir-biriga nisbatan ochiq-oydin sovuqlikni namoyish etishdan to‘xtamayapti. Agar yaqinda yarashuv bo‘lishi mumkin degan umidlar paydo bo‘lgan bo‘lsa, endi drama yanada keskinlashdi — Bruklin Bekhem ochiqchasiga ota-onasiga qarshi chiqdi:
“Men oilam bilan yarashishni istamayman. Yillar davomida jim yurardim. Ammo ota-onam matbuotga nima yozishni buyurishmoqda. Men esa o‘zimni himoya qilishga majburman.”

Tarozida: “hammasi yaxshi” va cheksiz jarlik

Mashhur oilani ikkiga bo‘lib yuborgan mojaroning ildizi 2022 yilga borib taqaladi — aynan o‘sha yili Bekhemlarning katta o‘g‘li amerikalik milliarderning qizi Nikola Peltzga uylangan edi. Ammo uzoq vaqt davomida kelin bilan qaynonaning o‘rtasidagi sovuq munosabatlar turli intervyulardagi umumiy iboralar bilan yashirib kelindi.

“Hammasi yaxshi”, — deya izoh bergan edi Bruklin oilalar o‘rtasidagi munosabatlarni. U jurnalistlarga bu “kichik kelishmovchilik”ka bunchalik e’tibor qaratmaslik kerakligini aytgan. Biroq keyinchalik uning rafiqasi intervyulardan birida eri onasi bilan munosabatlari juda murakkab ekanini ochiq tan oldi.

Nikola qaynonasi to‘y marosimini deyarli buzib yuborayozganini, kelinni ko‘ylaksiz qoldirish darajasiga yetganini aytdi. Qizning so‘zlariga ko‘ra, u boshidan boshlab seviklisining oilasidan sovuqlik sezgan va bu to‘yga tayyorgarlik jarayonida yaqqol namoyon bo‘lgan.

Nikolaning aytishicha, Viktoriya kelin uchun va’da qilingan ko‘ylak tikilishini doimiy ravishda kechiktirgan va marosimga juda yaqin paytda belgilangan muddatga ulgurmasligini bildirgan. Shundan so‘ng Posh to‘y sanasini ko‘chirishni taklif qilgan.

Ammo Peltz bo‘lajak qaynonasiga yon bermadi va Bruklin bilan Rimda onasi Klaudi Xeffner bilan birga tanlagan Valentino libosida nikohdan o‘tdi. Bu esa missis Bekhemni jiddiy ranjitdi — u Peltz bilan aloqani minimumga tushirdi, ijtimoiy tarmoqlarda uni e’tiborsiz qoldirdi va birgalikdagi suratlarni joylashni to‘xtatdi.

Qarshiliklar va onaning “Faxrlanaman!”

Oshiq Bruklin tanlagan ayolini to‘liq qo‘llab-quvvatladi va oilasi oldida uni himoya qildi. Hatto Devid Bekhem oila ichida jiddiy suhbat boshlagan, unda o‘g‘il qat’iy ravishda xotinining tarafini olgani haqida mish-mishlar tarqaldi.

Bruklin Nikola yashayotgan AQShga ko‘chib o‘tdi, seviklisiga bo‘lgan muhabbatini isbotlash uchun o‘nlab tatuirovkalar qildirdi. Eng katta shov-shuv esa u rafiqasining familiyasini olib, barcha ijtimoiy tarmoqlardagi nikneymlarini o‘zgartirgani bo‘ldi — u shu yo‘l bilan xotinining oilasi bilan yaqinligini ta’kidladi.

Endi uni Bruklin Peltz-Bekhem deb atashadi. Yosh yigit deyarli o‘z tug‘ilgan oilasini ikkinchi o‘ringa surib, yangi familiyani birinchi o‘ringa qo‘ydi. Ammo u bu mavzu bo‘yicha izoh berishdan qochmoqda.

Insayderlarning so‘zlariga ko‘ra, Viktoriya bu mojaro sabab juda iztirob chekmoqda, chunki Bruklin ota-onasi bilan aloqani deyarli to‘xtatgan, biroq ijtimoiy tarmoqlarda Peltzlar oilasi davrasidagi baxtli lahzalarini muntazam namoyish etmoqda. Avvallari Viktoriya katta o‘g‘li bilan juda yaqin edi, ammo to‘ydan so‘ng uning “yuragi parchalangan”.

Oilaviy qadriyatlarga soya solgan ranjish fonida Viktoriya yana bir bor kelinini ochiqchasiga inkor etdi: Bruklin va Nikola Xitoy Vogue jurnali muqovasi uchun suratga tushishdi. Ko‘p farzandli ona o‘g‘lini tabrikladi, ammo Nikolani tilga ham olmadi. “Faxrlanaman!” — deya qisqa izoh qoldirdi missis Bekhem.

Xush kelibsiz yangi hayotga, Bruklin Peltz-Bekhem!

Endi Bruklin uchun yangi hayot boshlandi — u xotinining oilasi bilan mamnuniyat bilan muloqot qilmoqda. Bundan tashqari, u muhim qarorlar borasida avvalo ota-onasi bilan emas, balki milliarder biznesmen bo‘lgan qaynotasi Nelson Peltz bilan maslahatlashmoqda.

Nikola esa erining ularning oilasiga qo‘shilganidan mamnun. U otasi murakkab biznes sohasida juda muvaffaqiyatli ekanini va Bruklinga turli loyihalarni rivojlantirishda yordam berishini, Bekhemlarning britan qarindoshlari esa asosan o‘z ish va loyihalari bilan band ekanini ta’kidlamoqda.

Uch yil davom etgan o‘tkir tushunmovchiliklardan so‘ng muxlislar nihoyat yarashuv bo‘ldi deb o‘ylashgan edi, ammo bu poyezd endi to‘xtamaydi. Tort ustidagi gilos esa — Bruklin avvallari onasiga bag‘ishlangan tatuirovkalaridan voz kechgani bo‘ldi. Buni mashhur yigitning diqqatli muxlislari payqashdi.

Bruklin Glamour uchun yalang‘och gavdada suratga tushdi. Endi yuragi yonida yozilgan samimiy “mama’s boy” va yelkasidagi “MUM” o‘rnini guldasta va ajdaho egallagan — go‘yo u onasiga bo‘lgan muhabbatni “yutib yuborgandek”.

Biroq Bruklinga yaqin insayder oilaga bo‘lgan muhabbat yo‘qolgani haqidagi mish-mishlarni rad etib shunday dedi:
“Har kim suratga qarab ‘onajonining o‘g‘li’ hali ham shu yerda ekanini ko‘rishi mumkin. U buni hech qachon yashirmagan.”

Auditoriya ikki lagerga bo‘lindi: ayrimlar yosh yigit mashhur ota-onasiga nisbatan noshukurlik qilmoqda va ayyor Nikola ta’siriga tushib, uni oilasiga qarshi qayrayapti deb hisoblaydi; boshqalar esa bu iqtidorli va istiqbolli yigit hayotidagi yangi bob boshlanganiga, u nihoyat mashhur familiya soyasidan chiqib, o‘z yo‘lini topishga kirishganiga ishonch bildirmoqda.