Misrda dunyodagi eng katta muzey ochildi

Misr poytaxti Qohirada 20 yillik qurilish va kechikishlardan so‘ng qiymati 1 milliard dollarga teng “Buyuk Misr muzeyi” (Grand Egyptian Museum) ochildi. Bu haqda Euronews xabar berdi.

Mazkur muzey — dunyodagi eng katta qadimiy sivilizatsiyaga bag‘ishlangan muzey bo‘lib, unda 50 mingdan ortiq eksponat, jumladan, fir’avn Tutanxamon maqbarasidagi barcha boyliklar ilk bor to‘liq namoyish etilmoqda.

Prezident Abdul Fattoh as-Sisi muzeyni “insoniyat madaniyati tarixidagi noodatiy voqea” deb atab, qadimgi misrliklar dahosi bilan zamonaviy misrliklarning ijodkorligini birlashtirganini ta’kidlagan.

Muzey yiliga 5 millionga yaqin sayyohni jalb etishi kutilmoqda. Bu ko‘rsatkich uni dunyodagi eng ko‘p tashrif buyuriladigan muzeylar qatoriga kiritadi — taqqoslash uchun, Fransiyadagi Luvr muzeyiga 2024-yilda 8,7 million kishi tashrif buyurgan.

Yetti mo‘jiza piramidalar yonida joylashgan bu ulkan bino uchburchak shaklli dizayni bilan ajralib turadi. Ichki qismidagi olti qavatli zinalar qadimiy haykallar bilan bezatilgan. Muzeyda ko‘rgazmalar bilan bir qatorda konferensiya zali, kutubxona, bolalar muzeyi hamda restoranlar ham mavjud.

Biroq ayrim mashhur qadimiy ashyolar hali bu ko‘rgazmaga qo‘yilmagan. Masalan, Rozetta toshi hozircha Londondagi Britaniya muzeyida, Nefertiti haykali esa Berlindagi Neues muzeyida saqlanmoqda. GEM ochilishi misrliklar orasida bu artefaktlarni vatanga qaytarish talabini yana kuchaytirgan.

Muzey qurilishi 2005-yilda boshlangan, ammo siyosiy beqarorlik va pandemiya sabab bir necha bor kechiktirilgan. Muzey 2024-yilning oktyabr oyida qisman ochilgan bo‘lib, uning tantanali ochilishi 2025-iyul oyiga rejalashtirilgan edi. Biroq, bu davrda Isroil va Eron o‘rtasida bo‘lib o‘tgan 12 kunlik urush tufayli marosim qoldirilgandi.Endi esa 4-noyabrdan boshlab u har kuni soat 9:00 dan 18:00 gacha ochiq bo‘ladi. Kattalar uchun kirish chiptasi 1 450 misr funti (taxminan 27 yevro) etib belgilangan.