Qishda qanday ovqatlanish lozim?

O`lkamizda qish. Bu fasl qanchalik chiroyli va fusunkor bo`lmasin, o`ziga yarasha tashvishli tomonlari ham bor. Ya`ni, odamlarda tez-tez shamollash, uyquga to`ymaslik, tushkunlik kayfiyati kabi salbiy holatlar namoyon bo`la boshlaydi. Bunga sabab nima? Shifokorlar bu kabi holatlarni ovqatlanish tartibini o`zgartirmaganimiz, ya`ni hamon yozdagiday ovqatlanishni davom ettirayotganligimiz bilan izohlaydilar. Haqiqatan ham shunday. Qish fasli bilan bog`liq ko`pgina muammolarni ovqatlanish tartibiga jiddiy e`tibor bergan holda hal etish mumkin, aslida. Ya`ni, bir odamning qish kunlari taomlardan oladigan o`rtacha quvvati 2000 kilokaloriyadan kam bo`lmasligi kerak. Uning bu miqdordan kam bo`lishi esa tanamizning chidamlilik darajasini kamaytiradi. Shuning uchun qish faslida kuchli parhezdan uzoqlashgan ma`qulroq. Chunki, bu faslda tanamizga oqsillar ham, uglevodlar ham ko`p miqdorda kerak bo`ladi. Xo`sh, bu kabi zarur moddalarni qaerdan olamiz?

Qishda eng ko`p xuruj qiladigan zararli mikroblarga qiron keltiradigan modda tsistein aminokislotasidir. Biz baliq, boshoqli ne`matlar va ko`katlar, soya mahsulotlari, parranda go`shti, pishloq va tvorog kabi mahsulotlardan kerakli miqdordagi tsisteinni olishimiz mumkin.
Mutaxassislar shamollashning oldini olish va davo maqsadida tez-tez tovuq sho`rva ichib turishni maslahat beradilar.
Shuni unutmangki, qishda immunitet tizimini mustahkamlash muhim ahamiyatga ega. Bu borada sariq rangli meva hamda sabzavotlar – apelsin, mandarin, limon, sabzi, oshqovoq kabi ne`matlar muhim o`rin tutadi. Bu mahsulotlarda viruslarni qiruvchi A, E, S darmondorilari hamda ularning singishiga yordam beruvchi bioflavonoitlar mavjud. Shuningdek, qish kunlari tez-tez qatiq ichib turish tavsiya etiladi. Chunki, qatiq tarkibidagi foydali bakteriyalar ichaklardagi shilliq pardaning viruslarga bardoshliligini oshiradi. Dasturxonimizdan tuzlangan karam, na`matak damlamasi hamda limonli choyni uzmasligimiz lozim.
Har kimning salomatligi o`z qo`lida ekanligini unutmaylik. Agar biz tanamizni turli mashqlar bilan chiniqtirib borsak va ovqatlanish tartibiga rioya etib, uning kerakli darmondori hamda mikroelementlarga boy bo`lishiga erishsak, har qanday kasallik bizdan yiroq bo`ladi. Sizchi, siz qanday ovqatlanyapsiz?