Yaxshi suhbatdosh bo`lishning oson yo`li.

Yaxshi suhbatdosh bo`lish unchalik qiyin emas. Bilasizmi, ashaddiy janjalkash ham sabr-toqatli inson oldida yumshaydi. Xuddi shu masala bir hikoyani aytib beray. Shahar telefon kompaniyasi bir o`ta shallaqi mijoz bilan muomalada qanday yo`l tutishni bilmay qoldi. Jahldor mijoz telefonistkalarni haqorat qilar, to`lov talabnomalarini yirtib tashlab, xizmat haqini to`lamas, ham gazetaga yozar, ham sudga berar, ishqilib, kompaniya rahbariyatini jonidan to`ydirgan edi.

Nihoyat kompaniya o`sha mijozning uyiga o`zining eng tajribali «diplomatini» yubordi. «Diplomat» vaysaqi cholning «lovvullab yonishi»ga imkon berib, gaplarini ma`qullab o`tiraverdi. «U quturar edi, – deb hikoya qiladi diplomat, – men esa uni uch soat gapini bo`lmay eshitdim. Shunday qilib mijozning uyida to`rt marta bo`ldim.

Oxirgi safar borganimda u tashkil qilmoqchi bo`lgan «Telefon abonetlarini himoya qilish assotsiatsiyasiga» a`zolikka qabul qilindim. Mana hozirgacha o`sha «assotsiatsiya»ning yagona a`zosi bo`lib kelmoqdaman. Men ko`rgan tadbir faqat cholni diqqat bilan eshitish, unga hamdardlik bildirib turish bo`ldi, xolos. Chol bora-bora yumshay boshladi, borishimdan maqsad-qarzlari to`g`risida bir so`z demagan bo`lishimga qaramay hammasini to`ladi.

Eng asosiysi, u kompaniya ustidan qaerga shikoyat qilgan bo`lsa, hamma arizalarini qaytarib oldi». O`z shaxsiyati bilan g`arq, muhim shaxs ekanligi haqidagi o`y hayollardan sarmast kishi eng zerikarli odamdir. Faqat o`zi haqida gapiradigan odam, faqat o`zi haqida o`ylaydi. Bunday kishi kim bo`lishligidan qat`iy nazar madaniyatsiz kishidir. Shuning uchun yaxshi suhbatdosh bo`lmoqchi bo`lsangiz yaxshi e`tiborli tinglovchi bo`ling. Kerakli odam bo`lish uchun boshqalarning ham kerakli ekanini his qilish kerak.

Suhbatdoshingizga javob berish ko`ngilli bo`lgan savollarni bering, o`zi, yutuqlari haqida so`zlashga rag`batlantiring. Unutmang, siz bilan gaplashayotgan odamni o`zi, muammolari siznikidan ko`ra yuz karra ko`proq qiziqtiradi. Uni qaysidir mamlakatdagi ocharchilikdan ko`ra, o`zining tishi og`riyotgani ko`proq tashvishlantiradi, bo`yniga chiqqan yara qaerdadir yuz berayotgan uzluksiz zilziladan ko`ra jiddiyroq vahimaga soladi. Keyingi gal kim bilandir suhbatga kirishishdan oldin bu haqda o`ylab oling. Shunday qilib, odamlarga yoqishni istasangiz, ushbu qoidaga rioya qiling: Yaxshi tinglovchi bo`ling. Boshqalarni o`zi haqida gapirishga rag`batlantiring.  Sizchi do`stim, siz ham tinglovchimisiz yoki tinmay gapiradigan insonmisiz?