Nima uchun erkaklar mustaqil va kuchli ayollar bilan yasholmaydi?

Ko‘pincha erkaklar muvaffaqiyatli, mustaqil ayollarni tashlab ketishlarini yoki ularga doim xiyonat qilib kelganini eshitamiz. Bunga Jennifer Lopesning yaqin orada Ben Afflek bilan ajrashishi misol bo‘la oladi. Bu agar siz kuchli shaxs bo‘lsangiz, ayniqsa, karyerangizda yutuqlarga erishgan bo‘lsangiz, oilaviy baxt topa olmasligingizni anglatadimi? Buni quyida Jennifer Lopes misolida ko‘rib chiqamiz.

Jennifer Lopesning nikohlar kolleksiyasi

Yulduz nafaqat xit qo‘shiqlari va rollari, balki notinch ishqiy munosabatlari bilan ham tanilgan. U to‘rt marta turmushga chiqqan va oxirgi daqiqada yana ikkita to‘y bekor qilingan. So‘nggi haftalarda hamma xonandaning 20 yil oldin munosabatlari boshlangan aktyor Ben Afflek bilan yaqinlashib kelayotgan ajrashishni muhokama qilmoqda.

Birinchi turmush o‘rtog‘i Oxani Noa ofitsiant bo‘lgan va 1997-yilda turmush qurishgandan so‘ng rafiqasi tufayli shou-biznesga kirib kelgan. Ularning nikohi bir yildan kamroq davom etadi va janjal bilan yakunlanadi — eri xonandaga xiyonat qilib kelgan va keyinchalik Lopesga tuhmat qilib, memuar ham yozgan, bu shov-shuvli sud jarayoniga sabab bo‘lgan.

Ikkinchi eri raqqos Kris Jadd bilan nikohi ham juda qisqa davom etgan — 2001-yildan 2002-yilgacha — uning so‘zlariga ko‘ra, erkak shon-shuhrat yukini ko‘tara olmagan. Doimiy jamoatchilik e’tibori er-xotinni shaxsiy hayotidan mahrum qilgan.

Lopes 2002-yilda tanishgan aktyor Ben Afflek ham xuddi shunday muammoga duch keladi. Bundan tashqari, u o‘zini mashhur xotinining soyasida qolgandek his qiladi. Natijada juftlik turmush qurmay, ajralishadi.

Farzandlarining otasi qo‘shiqchi Mark Entoni bilan Lopes eng uzoq va kuchli munosabatlarga ega edi — 7 yil, 2007-yildan 2014-yilgacha. Ammo bu nikoh ham kelishmovchiliklar va erining ko‘plab xiyonatlari tufayli buziladi.

2017-yildan 2021-yilgacha beyzbol o‘yinchisi Aleks Rodriges bilan bo‘lgan shiddatli romantika ham oxir-oqibat tugaydi. Bu nikohning buzilishiga ham erkakning ko‘plab xiyonatlari sabab bo‘ladi.

2022-yilda Jennifer nihoyat eski sevgilisi — aktyor Ben Afflek bilan unashtiriladi va tez orada to‘y bo‘ladi. Ikkalasi ham ulg‘aygan, yorqin, voqealarga boy hayot kechirgan va har birining muvaffaqiyatli karyerasi bor edi. 

Ammo ikki yil o‘tgach, er-xotin Beverli-Xillzdagi uyini sotadi. Insayderlarning so‘zlariga ko‘ra, juftlikning ajralishiga Jenniferning fe’l-atvori va doimiy ravishda nazorat qilish istagi sabab bo‘lgan.

Nega erkaklar hatto Jey Lo kabi kuchli va muvaffaqiyatli ayolga xiyonat qiladi?

Jey Lo misolida uning injiq xarakteri va hamma narsani nazorat qilish istagi ustunligini ko‘rish mumkin. Misol uchun, u xizmat ko‘rsatish xodimlariga ko‘ziga tik qarashni taqiqlaydi. U bilan bahslashish, belgilangan qoidalarni buzish mumkin emas. Misol uchun, Afflek bir marta kazinoda yaxshigina choychaqa qoldirgan. Guvohning so‘zlariga ko‘ra, “Lopes jahli chiqqan holda stoldagi pulni yig‘ishtirib olgan”.

Psixologlarning fikriga ko‘ra, muvaffaqiyatli ayollarga xiyonat qilishlarining asosiy sabablari:

1. Erkakning avtonomiyani saqlab qolish istagi

Demak, tenglikni, adolatni, ehtiyojlari va his-tuyg‘ularini hurmat qilishni tiklash istagi. Bu ochiq to‘qnashuvlar yoki passiv tajovuz, haqiqatdan qochish — giyohvandlik yoki xiyonat bilan xarakterlanadi. Kuchli odam shunchaki ketadi. Ben Afflek aynan shunday qiladi: xotini tashabbus va nazoratni o‘z qo‘liga olganida, u o‘zini noqulay his qiladi va alohida yashay boshlaydi.

2. “Ikkinchi” bo‘lishni istamaslik va erkak shaxsiyatining inqirozi

Albatta, nikohda xotirjamlik bilan bo‘ysunuvchi rolni o‘ynaydigan o‘ziga xos turdagi erkaklar mavjud. Ammo hech bir ayol yonida bunday erkak bo‘lishini xohlamaydi.

Umuman olganda, erkakning ikkinchi darajali rolda ekanligi bilan kelishish qiyin: u oila boshlig‘i bo‘lolmaydi, karyerasida muvaffaqiyat qozonolmaydi. Bunday vaziyatda u xotini bilan raqobatlashadi, rafiqasini ayol sifatida qabul qilinishini to‘xtatadi. “Bu ayol emas, yubka kiygan erkak” degan fikr uning ruhiyatini azoblaydi.

3. Mas’uliyatsizlik va hafsalasi pir bo‘lishidan qo‘rqish

Potensial juftligi jamiyatda yuqori mavqega ega bo‘lgan, ko‘p pul topadigan va bundan tashqari, talabchan bo‘lgan ko‘plab erkaklar uning yuqori rejalarini, shuningdek, jamiyatning umidlarini qondirmaslikdan qo‘rqishadi. Natijada noaniqlik va munosabatlardan qochish yoki umuman kirishmaslik istagi yana paydo bo‘ladi.

4. Manfaatlar to‘qnashuvi

Bundan tashqari, muvaffaqiyatli ayollar ko‘pincha karyerasi bilan band bo‘lib, oilasiga vaqt va e’tiborini kamaytiradi. Agar erkak o‘zini birinchi emas, balki ahamiyatsiz his qilsa, u ketadi.

Kuchli ayollar baxtli munosabatlarga ega bo‘lishlari mumkinmi?

• Doimiy ravishda his-tuyg‘ularingizni, umidlaringizni va tashvishlaringizni muhokama qiling. Bir-biringizni tinglang va sherigingizning pozitsiyasini, uning qo‘rquvi va tashvishlarini tushunishga harakat qiling.
• Erkakning muvaffaqiyatlarini tan oling va qadrlang. Ular u uchun juda ko‘p narsani anglatadi.
• Birgalikdagi mashg‘ulotlar va dam olish uchun vaqt ajrating, u yerda ish haqida hech qanday gap bo‘lmaydi.
• Bir-biringizning shaxsiy vaqt va makonga, sevimli mashg‘ulotlarga bo‘lgan ehtiyojlaringizni hurmat qiling.
• O‘z ustingizda ishlang. Hamma narsani nazorat qilish istagi, patologik rashk ko‘pincha bolalik va o‘smirlik davrida paydo bo‘lgan erkaklarga va dunyoga ishonchsizlikdan kelib chiqadi. Ularni yengish mumkin, ko‘pincha yaxshi terapevt yordami bilan.
• Roldan rolga o‘tishni o‘rganing. Oilada farzandlaringiz uchun mehribon ona, eringiz uchun muhabbatga to‘la ayol, sadoqatli rafiqa, har qanday vaziyatda yonida bo‘ladigan umr yo‘ldosh bo‘lish o‘zingizning qo‘lingizda.