CS:GO, DOTA2, FIFA: O‘zbekistonda sovrin jamg‘armasi 332 mln so‘mlik kibersport chempionati bo‘lib o‘tadi

3-apreldan kibersport bo‘yicha O‘zbekistonning sovrin jamg‘armasi 332 mln so‘mni tashkil qiluvchi yirik turniriga ro‘yxatga olish boshlanadi. Bu haqda IT Park xabar bermoqda.

Turnirdan ko‘zlangan asosiy maqsad — kibersportchilarning kibersport yo‘nalishi bo‘yicha ko‘nikmalarga ega bo‘lishi va takomillashtirishiga bo‘lgan motivatsiyasini oshirish, shuningdek, ushbu yo‘nalishni keng ommalashtirish va sportchilarni yagona tizimga birlashtirishdan iborat.

Musobaqa “Cybergame.uz” platformasida CS:GO, DOTA2, PUBG Mobile, FIFA, eFootball kabi sport yo‘nalishlari bo‘yicha o‘tkaziladi.

Turnir quyidagi bosqichlardan iborat bo‘ladi:

1. Har bir hududda tuman (shahar) onlayn kvalifikatsiyalari;
2. Yarimfinal kompyuter klubida oflayn formatda;
3. Toshkent shahrida bo‘lib o‘tadigan Oflayn formatdagi grand final.

Turnirda 16 yoshga to‘lgan va OneID tizimi orqali “Cybergame.uz” portalida ro‘yxatdan o‘tgan hamda respublika fuqarosi bo‘lgan har bir o‘yinchi ishtirok etishi mumkin.

Ro‘yxatga olish 3-apreldan boshlanib 10-aprelgacha davom etadi.  Saralashning keyingi bosqichlari haqida ko’proq ma’lumot keyinroq taqdim etiladi.

Turnir O‘zbekiston Raqamli texnologiyalar vazirligi, O‘zbekiston Respublikasi Yoshlar siyosati va sport vazirligi, shuningdek, IT-Park direksiyasi va O‘zbekiston kibersport assotsiatsiyasi ko‘magida o‘tkaziladi.