“O‘rgimchak odam” yulduzi Tom Holland ruhiy xotirjamlik uchun ijtimoiy tarmoqlarni tark etdi

“O‘rgimchak odam” yulduzi Tom Holland ijtimoiy tarmoqlardagi faoliyatini yakunlayotganini e’lon qildi. Gollivud aktyori o‘zining Instagram sahifasiga xayrlashuv videosini joylashtirdi va uni Twitter bilan birgalikda telefonidan o‘chirib tashlashini ma’lum qildi. Tomning so‘zlariga ko‘ra, ijtimoiy tarmoqlar uning ruhiy holatiga salbiy ta’sir qilishi bilan birga, juda ko‘p vaqtini ham olmoqda, deb yozadi People Talk.

“Ijtimoiy tarmoqlar menga bo‘g‘uvchidek tuyiladi. Internetda o‘zim haqimda biror narsa o‘qiganimda, juda qo‘rqaman, xavotirga tushaman va bu mening ruhiy holatimga yomon ta’sir qiladi. Shu tufayli ham men ushbu qadamni qo‘yishga va telefonimdagi dasturlarni o‘chirishga qaror qildim”, — deya xayrlashdi Tom Holland o‘zining ko‘p millionli auditoriyasi bilan.

Shuningdek, aktyor muxlislarni ruhiy salomatligiga e’tibor berishga chaqirdi va ularga hissiy holatini kuzatish va nazorat qilishda yordam beradigan ijtimoiy xayriya tashkilotlar bilan o‘rtoqlashdi.