“Yuventus”dan 15 ochko olib tashlandi. Klubning sobiq rahbarlari esa diskvalifikatsiya qilindi

Turin jamoasi sobiq rahbarlariga ham jazo tayinlandi.

Sobiq prezident Andrea Anyelli va bosh direktor Maurisio Arrivabene 2 yilga, sobiq vitse-prezident Pavel Nedved 8 oyga, hozirda “Tottenhem” sport direktori lavozimida faoliyat olib borayotgan Fabio Paratichi esa 2,5 yilga futboldan chetlatildi.

Shuningdek, turinliklardan 15 ochko olib tashlandi. Hozirda jamoa 22 ochko bilan musobaqa jadvalida 10-o‘rinni egallab turibdi.

Eslatib o‘tamiz, “Yuventus” futbolchilarning transfer narxini oshirib ko‘rsatganlikda, shuningdek, xodimlarning xarajatlari haqidagi ma’lumotlarni va futbolchilar maoshining haqiqiy hajmini yashirganlikda ayblangan edi.

Anyelli “Yuventus”ni 2010-yilning may oyidan beri boshqarib kelgan edi. Uning qo‘l ostida klub ketma-ket 9 marta Italiya chempionligini qo‘lga kiritdi, ikki bor Chempionlar Ligasi finaliga yetib bordi, besh martadan Italiya Kubogi va Superkubogida g‘alaba qozondi.