UEFA ga DFL raqobat bo`la oladimi?

Qatar jahonning eng kuchli futbol klublari o`rtasida xalqaro musobaqa tashkil etishni rejalashtirmoqda.  «Orzular futbol ligasi» (Dream Football League, DFL) deb atalayotgan musobaqa tashabbuskori sifatida Qatar qirollik oilasi chiqmoqda. Taxminlarga ko`ra, dastlabki musobaqa 2015 yilda o`tkaziladi, shundan so`ng u har ikki yilda Qatarda va unga qo`shni mamlakatlarda o`tkaziladi.

Musobaqada 24 jamoa ishtirok etadi, ulardan 16tasi doimiy ishtirokchi bo`lsa, qolgan sakkiz jamoa maxsus taklifnomalar orqali chaqiriladi. The Times ma`lumotlariga ko`ra, tashkilotchilar «Manchester Yunayted», «Manchester Siti», «Chelsi», «Arsenal» va «Liverpul`» jamoalariga musobaqada ishtirok etish bo`yicha taklifnomalar yuborishgan. Lekin ushbu jamoalarning vakillari bu axborotga izoh berishdan bosh tortishdi.

Qatar «Manchester Yunayted» va «Barselona» kabi klublarining musobaqadagi ishtiroki uchun 200 million evro to`lashga ham tayyor. Taqqoslash uchun, 2011/12 yilgi mavsumda Evropa Chempionlar ligasida g`olib chiqqan Angliyaning «Chelsi» klubi UEFAdan 54 million evrodan ko`proq mukofot puli olgan edi.

The Times’ning qo`shimcha qilishicha, yangi musobaqa Qatarda jahon chempionatini o`tkazish bilan bog`liq shubhalarni yo`qqa chiqarishga yordam berishi kerak. Xususan, «orzular ligasi» bahslarini xuddi jahon chempionati bahslaridagi kabi – yozda, Qatarda havo harorati 40 daraja issiqqa etadigan vaqtda tashkil etish rejalashtirilmoqda. Qatar stadionlarni «iqlim-nazorat» («klimat-kontrol») tizimi bilan ta`minlaydi, bu esa o`yinlar vaqtida futbolchilar va tomoshabinlar uchun qulay ob-havo sharoiti yaratib beradi.