Sizning qobiliyatlaringiz…

Bir ayol voyaga etgan o`g`lining maroq bilan rasm solishini kuzatyapti. U o`g`liga mehr bilan tikilar ekan:  “Ko`z tegmasin, o`g`lim juda qobiliyatli”, ‑ deb qo`yadi.

Har bir kishining o`ziga yarasha qobiliyatlari bo`ladi. Kimdadir bor qobiliyat, boshqa birovda bo`lmasligi ham mumkin. Kimdadir rasm solish qobiliyati, boshqa birovda o`qituvchilik qobiliyati, yana birovda notiqlik qobiliyati, ba`zilarda biznes qila olish qobiliyati, yoki boshqara olish qobiliyatlari mavjud.

Xudo har bir insonga qobiliyat ato etadi. Hatto hech qanday qobiliyatga ega emasman degan odamning ham bir narsada qobiliyati bo`ladi. Buni o`zi ko`ra olmaydi holos. Agar hech qanday qobiliyatga ega emasman deb o`ylasangiz, o`zingizni yaxshilab tekshirib chiqing. Umuman o`zligingizga qarang, albatta biror narsada qobiliyatingiz borligini ko`rasiz.

Ammo qobiliyat ham o`z o`zidan rivojlanib qolmaydi. Xudo bergan qobiliyat ustida ishlashga to`g`ri keladi. Agar qobiliyatingizga e`tibor bermasangiz va uni ishlatmasangiz o`zligingizning  bir chekkasida chang bosib, yo`qolib ketadi. Bir oilada yigitcha yoshligidan juda ajoyib rasmlar chizadi. Hamma qarindosh urug`lar va ota‑ona uning bu qobiliyatidan juda fahrlanadi. Ammo o`sha yigitchaning bu qobiliyatiga e`tibor bermay, o`z holiga tashlab qo`yilsa, bu qobiliyat oddiy qiziqishga aylanib qoladi.

Farzanddagi qobiliyatni sezgan ota‑ona shu qobiliyatini rivojlantirish uchun uni maxsus maktabga yoki ustozga bersa boladagi qobiliyat yana rivojlanib yuqori cho`qqiga ko`tariladi. Har bir insondagi iste`dod insonning o`zida qolmay yuzaga chiqqani ma`qul. Shunda bu iste`doddan boshqalar ham bahramand bo`ladi.  Taniqli bastakor Iogann Bax ham juda yosh paytidan musiqaga qiziqqan. Nafaqat qiziqqan unda musiqaga hos qobiliyat va iste`dod bo`lgan. Shu iste`dodining rivoji natijasida bugungi kunga qadar o`lmay kelayotgan musiqiy asarlar yaratgan.

Yoki bo`lmasa mashxur rassom Leonardo da Vinchini olaylik. U ham yoshligidan tabiatga va ranglarning uyg`unligiga qiziqishi baland bo`lgan. Undagi bu qiziqishning qobiliyatga aylanishida amakisining o`rni katta bo`lgan. Dastlabki rasmlarini ko`rgan otasi uni o`sha zamonning mohir rassomi qo`liga shogirdlikka bergan.

Demak undagi qobiliyat ham o`qish va izlanishlar natijasida rivojlangan. Undagi bu iste`dod o`sha zamonning mashhur kishilarini ham lol qoldirgan. Bugun biz uning asarlariga qanchalik hayrat va qiziqish bilan qarayotgan bo`lsak, Leonardoning  zamondoshlari ham uning asarlaridan bizdan kam zavq olishmagan.

Ta`lim berishga qobiliyatingiz bormi, albatta bu qobiliyatni o`stirish uchun ko`proq o`qib o`rganing va bilganlaringizni boshqalarga o`rgating. Chunki ta`lim berishga qobiliyati bor odam boshqa bir ta`lim berishga qobiliyati bo`lmagan odamdan ko`ra yaxshiroq va samaraliroq ta`lim bera oladi. Shunday odamning bergan bilimlari o`rganuvchining esida qoladi.

Demak har kim o`z qobiliyatlariga ko`ra ish tutsa uning qilayotgan ishi o`ziga ham zavq beradi, boshqalarga ham foydasi tegadi. Sizda qanday qobiliyat bor aziz suhbatdosh? Keling, qobiliyatlarimiz haqida suxbatlashsak.