Mitti Rabbit R1 antismartfoni taqdim etildi

Katta salohiyatga ega kichik qurilma klassik mobil telefonlar o‘rnini egallashi mumkin. 

CES 2024 maishiy elektronika ko‘rgazmasi doirasida Rabbit R1 «yangi avlod gadjeti» taqdim etildi. Ishlab chiqaruvchiga ko‘ra, bu — sun’iy intellektga asoslangan antismartfon, unda hech qanday ilova bo‘lmaydi. 

Rabbit R1 klassik mobil telefondan butunlay farq qiladi. U 2,88 dyuymli sensorli ekranga, aylanuvchi kameraga va interfeyslarni aylantirishga mo‘ljallangan g‘ildirakchaga ega. 

Rabbit R1 ichida 2,3 GGs chastotali MediaTek protsessori, 4 Gb operativ xotira va 128 Gb ichki xotira, shuningdek, quvvati bir kunga yetadigan batareya mavjud. Bularning barchasi Teenage Engineering firmasi dizayniga ega mitti korpusda yashiringan. 

Qurilma qo‘ng‘iroqlarni amalga oshirishi (SIM-slot bor), xabarlar yuborishi, har qanday savollarga javob berishi va taksiga buyurtma berish yoki restoranda stol band qilish kabi ko‘rsatmalarni bajarishi mumkin. Qurilmaning konsepsiyasi oddiy – sizga ilovalar kerak emas, faqat shaxsiy sun’iy intellekt (SI) yordamchisi bilan muloqot qilish uchun qulay interfeys kifoya. 

Buning uchun kompaniya o‘zining Rabbit OS operatsion tizimini ishlab chiqdi. U bilan musiqa pleyerini boshqarish, kamera orqali mahsulotlarni tanib olish, fayllarni yuborish va boshqa amallarni bajarish mumkin. 

Rabbit R1 mart oyida 199 dollardan (≈2,5 mln so‘m) sotuvga chiqariladi.