Tashvishlanish

Tashvishlanish ham mavzu bo`libdimi, deb o`ylayotgandirsiz. Albatta mavzu bo`lishga arziydi. Ishli odam, qanday holatda ishlashni ham bilishi kerak. Mehnat qilishning eng yaxshi odati bu: ish stolining toza va taxt turishidir. Biz erkaklar ko`pincha bunga e`tibor qilmaymiz. Ish stolimiz yoyilib yotsa ham yig`ishtirib qo`yishga, vaqt va kuch sarflashni istamaymiz.

Biroq uyga kelganda, xonadonimiz toza turishini ayolimizdan talab qilamiz. Demak tozalikni yoqtiramiz. Faraz qilaylik, ishga kelib, xonangizni ochdingiz, to`g`rida ish stolingiz ustida turli xil qog`oz va xujjatlarga ko`milgan holda turibdi. Bu ko`rinish sizda yoqimsiz his uyg`otadi. Buni ko`pincha sezmasangiz ham, aslida shunday. Faqat ishingizni tezroq boshlash uchun ham bunga e`tibor qilmaysiz, xolos.

Undan tashqari stolingizdagi tartibsizlik ish unumingizga ham yomon ta`sir qiladi. Izlagan narsangizni vaqtida topolmaysiz, qo`ygan narsalaringiz yo`qolib qoladi. Bu narsalar sizning asabingizni taranglashtiradi, tashvishga qo`yadi. Lekin bu hammasi emas. Stol ustida kecha va undan oldingi kunlardan qolgan bajarilmagan ishlar turibdi. Bular ham sizni tashvishlantiradi.

Ish ko`payaveradi, hammasini bajarishga esa vaqtingiz etmaydi.  Shunday qilib, qilinmagan ishlar soni o`saveradi. Tashvishlanish esa qon bosimini oshiradi, yurakning bir maromda ishlashini buzadi, oshqozonda yara paydo qiladi. Qanday qilib, ish stolini tartibga keltirish mumkin.

Shu o`rinda bir hikoyani eshiting: Bir kishi ruhshunos huzuriga kelibdi. Biroq gapini boshlashga ulgurmay, qo`ng`iroq jiringlabdi, doktor telefonga javob beribdi. Yana og`iz juftlagan zahoti, kotiba kirib, bir muammoga yordam so`radi, doktor o`sha ondayoq javobini ham berdi.

Keyin yana qo`ng`iroqlar, doktor hammasiga aniq va tiniq javob berib, ortiqcha savolga hojat qoldirmayotgan edi. Nihoyat doktor mijozga o`girilib, uni eshita olmaganidan, kuttirib qo`yganligidan hijolab bo`lib uzr so`radi. Mijoz esa xoxolab kuldi-da, rahmat aytib kabinetdan chiqib ketdi. Ha, aytgandek mijoz kirib kelganidayoq, doktorning ish stoli batartib ekaniga ko`zi tushgandi.

Olti oydan so`ng o`sha mijoz yana o`sha doktor huzuriga kelibdi. Bu safar u ancha o`zgargandi. U birinchi safar nega kulganini bilasizmi? Doktorni kuzatish asnosida u o`zining xatosini tushunib etgandi. Uning kabinetida bir emas ikkita stol bo`lib, ikkalasi ham xujjatlar, kerakli va keraksiz qog`ozlarga to`la edi. U kabinetiga qaytib borib, keraksiz, bir necha yillik xujjatlarni axlat chelakka uloqtirdi.

Hamma ishlarni o`z vaqtida cho`zmasdan qilishga o`rgandi. Stolining usti toza turadigan bo`ldi. Mehnatdan odam o`lmagan, degan maqolni eshitgansiz. Bu haqiqatdan ham to`g`ri. Evropaliklar ham shu fikrga qo`shilishar ekan. Kishi mehnatdan emas, asabiy zo`riqishlar va tinimsiz tashvishlanishlardan o`lishi mumkin ekan.

Mana sizga bir maslahat, har bir ishingizni muhimligiga qarab, o`z vaqtida bajarishga odatlaning. Shunda bajarilmagan ishlar taxlanib qolmaydi. Onangiz yoshligingizdan erta tursang kuning barakali bo`ladi, deb aytgani aniq. Siz ham shunday qiling. Ertaroq turib, kuningizni rejalashtiring. Ish stolingiz toza bo`lib, hamma ishlaringiz vaqtida bajarilsa, asabiylashmaysiz va tashvishga ham xojat qolmaydi.