Yaponiyada dunyodagi ilk Pokemon aeroporti ochiladi — muxlislar uchun haqiqiy orzu!

Bu yozda Yaponiyada anime va geym ixlosmandlari uchun tarixiy voqea yuz beradi: dunyodagi ilk Pokémon uslubidagi aeroport ish boshlaydi. Gap Isikava prefekturasidagi qayta ta’mirlangan Noto Satoyama aeroporti haqida ketmoqda. U vaqtincha “Noto Satoyama Pokémon With You” deb nomlanadi. Loyiha 2024-yilda Noto yarimorolida yuz bergan kuchli zilziladan keyin hududni tiklash dasturining bir qismiga aylangan.

E’lon qilingan suratlarga qaraganda, aeroport juda yorqin va deyarli multfilmga o‘xshash uslubda bezatiladi. Ayrim joylari oddiy aeroportdan ko‘ra to‘g‘ridan-to‘g‘ri anime sahnasini eslatadi.

Prefektura bayonotida shunday deyiladi:

“Biz butun mamlakatdagi Pokémon muxlislari ushbu franshiza bilan bog‘liq noyob loyihalarni ko‘rishini istaymiz. Bu turizmni rivojlantirishga, hududni qo‘llab-quvvatlashga va Noto aholisi hayotiga quvonch olib kirishga yordam beradi”.

Yangilangan aeroportda katta anime dekoratsiyalari, tematik zonalar, noodatiy taomlarga ega kafelar va eksklyuziv mahsulotlar sotiladigan do‘konlar paydo bo‘ladi.

Yo‘lovchilar aeroportga kirishi bilanoq Pokémon olamiga tushgandek bo‘ladi: pokemonlar tasvirlari peshlavhalarda, teletraplarda, devorlarda va hatto kuzatuv maydonchasida ham joylashtiriladi. Tom qismida esa “Pikachu qishlog‘i” nomli maxsus installyatsiya quriladi.

Atrium markaziga ikki qavatli ulkan kompozitsiya o‘rnatiladi — sharlar orasidagi samolyot atrofida uchuvchi turdagi pokemonlar joylashadi. Ma’lum bo‘lishicha, bunday pokemonlarning 111 turi mavjud ekan. Prefektura vakillari hazil tariqasida sayyohlarga “hammasini tutib ko‘ring” deb taklif qilmoqda.

Terminal ichida Pikachu, Plusle va Minun’ning uch o‘lchamli figuralarini ko‘rish mumkin bo‘ladi. Do‘konlarda esa eksklyuziv merch sotiladi: bagaj birkalari, breloklar, chamadon kamarlari va maxsus kiyimlar.

Uchinchi qavatdagi Anon kafesida mehmonlar pankeyklar va anime uslubidagi ichimliklardan tatib ko‘rishlari mumkin bo‘ladi. Hatto taomlarni bezatish uslubi ham Pokémon mavzusida bo‘ladi.

Pokémon uslubi faqat aeroport ichida qolmaydi. Brendlangan avtobuslar terminalni Noto yarimorolining diqqatga sazovor joylari bilan bog‘laydi. Bu hududda allaqachon Pokémon mavzusidagi obyektlar paydo bo‘la boshlagan.

“Noto Satoyama Pokémon With You” aeroporti 2026-yil 7-iyul kuni ochiladi. Biroq bu “pokemonlashtirish” vaqtinchalik bo‘ladi — aeroport ushbu ko‘rinishda faqat 2029-yil sentyabrigacha faoliyat yuritadi.