Mehnatimni qadrlashmadi

O`tgan hafta o`zbek futbolida shov-shuvli voqelik ro`y berdi. Farg`onaning «Neftchi» klubini 1987 yildan buyon boshqarib kelayotgan tajribali mutaxassis Yuriy Sarkis­yan iste`foga chiqarildi. Xo`sh, jamoaning 27 yillik boshqaruvchisi aynan qaysi sabablar bilan ishdan bo`shatildi? Umuman, uni bu haqda ogohlantirishganmidi?

15 may kuni ertalab «Neftchi» qarorgohiga ketayotsam, klub rahbariyatida ishlaydigan kishilardan biri yonimga kelib, borishim shart emasligi, meni iste`foga chiqarishganini aytdi. Hayron bo`lib ortga qaytdim. Bitta jamoa­ga ko`p yillar davomida mehnating singsa-yu, uni qadrlashmasa, alam qilarkan. Lekin kutilmaganda bunday qaror qabul qilinishi, oldinroq ogohlantirishmagani to`g`risi, hayron qoldirdi. Buni o`zimga nisbatan adolatsizlik, deb hisoblayman, deydi Yuriy Sarkisyan.

Yana so`zida davom etib, xo`p, men-ku ketyapman. Lekin ko`p yillar davomida «Neftchi»da turli lavozimlarda ishlagan 80 yoshli Lev Viktorovich Vaxtin, aka – uka Abdusamad va Rustam Do`rmonov, Sergey Lebedevni nega iste`foga chiqarishdi? Shunisini tushunmadim. Lebedev sobiq ittifoq parchalanganidan keyin jahon terma jamoasi tarkibida to`p surgan yagona futbolchi. Afsus, uning ham qadriga etishmadi, deydi sobiq klub bosh murabbiyi Yuriy Sarkisyan. Shuning dek «Guliston»ga qarshi uchrashuvda yuzaga kelgan vaziyat, ya`ni tanqidiy maqola chiqqani uchun «Farg`ona haqiqati» gazetasini yirtib tashlash aktsiya­si xususida bexabar ekanini xam takidlab o`tgan.

Xozirda Yuriy Sarkisyanga Oliy liganing 2ta klubidan takliflar tushgan. Ammo Sarkisyan bu takliflarni hozirchalik qabul qilmagan. Sababi bo`lib o`tgan vaziyatlardan so`ng hordiq chiqarib, bir oz o`ziga kelib olishi kerakligi takidlab o`tgan.

Ma`lumot o`rnida shuni aytib o`tmoqchimizki, Yuriy Sarkasyan 1983-1986 yillarda «Neftchi» katta murabbiy, 1987-2013 yillarda bosh murabbiy faoliyatida ishlagan. Shuningdek, 1997 yili O`zbekiston milliy terma jamoasida katta murabbiy, 2000 yili bosh murabbiy sifatida faoliyat olib borgan. 1984-1985 yillarda Moskvadagi Murabbiylar oliy maktabida tahsil olgan. O`zbekistonda xizmat ko`rsatgan murabbiy «Do`stlik» va «Mehnat shuhrati» ordenlari bilan mukofotlangan.

Milliy chempionatimizga asos solinganidan keyin uning qo`l ostida «Neftchi» 5 marta oltin (1992-1994, 2001) 9 marta kumush (1996-2000, 2002-2004, 2006) va 1 marta bronza (2008) medalini qo`lga kiritdi, 2 marta O`zbekiston kubogi (1994, 1996) sohibiga aylandi. Bundan tash­qari, «Neftchi» 1994 yili MDH Chempionlar kubogida 2-o`rin, 1995 yili Osiyo Chempionlar kubogida 3-o`rinni egallagan. Sarkisyan – O`zbekistonning 5 marta eng yaxshi murabbiyi (1998, 1999, 2001, 2003, 2006) deb tan olingan.