Amerikalik aktyor Al Pachino pandemiya davrida klinik o‘limni boshdan kechirgani haqida so‘zlab berdi

“Cho‘qintirgan ota” filmidagi ishtiroki bilan dunyoga tanilgan amerikalik aktyor Al Pachino koronavirus pandemiyasi davridagi sog‘lig‘idagi jiddiy muammolarni o‘tkazgan kunlar haqida so‘zlab berdi.

84 yoshida aktyor klinik o‘limni boshdan o‘tkazdi. The New York Times gazetasiga bergan intervyusida Al Pachino o‘sha paytda hech qanday g‘ayritabiiy tush ko‘rmaganini va nimalar bo‘lganini eslay olmasligini ta’kidladi.

“O‘z uyimda tinch holatda o‘tirgan edim, so‘ng o‘zimni juda yomon his qila boshladim. Tana haroratim ko‘tarilib ketgach, organizmim suvsizlana boshladi. Shuning uchun kimdandir hamshirani chaqirib kelishlarini so‘radim. Atrofdagilardan suv so‘radim. Keyin esa menda birdan klinik o‘lim sodir bo‘lgan ekan. Barchasi juda tez va oddiy sodir bo‘ldi. Yurak urishim to‘xtagan edi”, dedi aktyor.

Tez yordam mashinasi sanoqli daqiqalarda yetib keldi. O‘ziga kelganda aktyor tepasida himoya kiyimidagi oltita feldsher va ikkita shifokor bemorni qurshab olgan edi.

“Hamma yonimda turgan edi va ular “U o‘ziga keldi”, deyishgani esimda”,  dedi Pachino.

Shuningdek, aktyor o‘lim yoqasida hech qanday oppoq yorug‘likni yoki boshqa g‘ayrioddiy narsalarni ko‘rmaganini qo‘shimcha qildi. Jurnalistlarning o‘lim bilan to‘qnash kelish uning hayotini o‘zgartirdimi yoki yo‘qmi degan savoliga u: “Umuman o‘zgartirmadi” deb javob berdi.

Ma’lumot uchun, Alfredo Jeyms (Al Pachino) 1940-yil 25-aprelida AQSHning Nyu York shahrida, kelib chiqishi italiyalik bo‘lgan amerikaliklar — Salvador va Roza Pachinolar oilasida tug‘ilgan.

Kinodagi ilk katta roli rejissyor Jerri Shatsbergning “Nidl-Parkdagi vahima” kartinasida Bobbi qahramoni edi. Shundan so‘ng Pachino rejissyor Frensis Ford Koppola e’tiboriga tushgan.

Muvaffaqiyatli kino karyerasidan tashqari, Al Pachino mashhur teatr aktyori hisoblanadi. U 1969-yil va 1977-yillarda mashhur “Toni” teatr mukofotlari bilan taqdirlangan. U o‘z faoliyati davomida “Cho‘qintirgan ota”, “Amerika farishtalari”, “Guchchi uyi”, “Ikkinchi imkoniyat” kabi ko‘plab loyihalarda suratga tushgan.