Gretsiyada bepul yashash taklif qilinmoqda

Gretsiyada sayyohlarga g‘ayrioddiy imkoniyat taklif etilmoqda. Biroq bu taklifning muhim sharti bor, deb xabar bermoqda “Podroze.gazeta”.

Gap uysiz mushuklarni qutqarish bilan shug‘ullanuvchi mahalliy tashkilotning ko‘ngillilar dasturi haqida ketmoqda. Bepul turar joy va nonushta evaziga jamoaga qo‘shilib, hayvonlarni parvarishlashda yordam berish lozim.

Ko‘ngillilar kuniga taxminan 5 soatdan, haftasiga 5 kun ishlaydi. Ularning vazifalariga mushuklarni oziqlantirish, hududni tozalash, adyollarni yuvish, yangi hayvonlar uchun joy hozirlash, shuningdek, asrab olinishga tayyorlanayotgan mushukchalarni parvarishlash kiradi. Ba’zan kasal hayvonlarga yordam berish yoki qiyin damlarda ularning yonida bo‘lishga to‘g‘ri keladi.

Ishtirokchilar tashkilot hududida 3-4 kishidan bo‘lib yashaydi. Har birining o‘z xonasi bor, lekin oshxona va umumiy dam olish joyi bitta. Shu bilan birga, orolga borish uchun yo‘lkira, tushlik va kechki ovqat xarajatlarini ko‘ngillilarning o‘zi to‘laydi.

Ishdan tashqari, ishtirokchilarning dam olish uchun ham yetarlicha vaqti bo‘ladi: ular orolni o‘rganishlari, dengizga borishlari yoki boshqa shaharlarga sayohat qilishlari mumkin. Xususan, orol poytaxti – Ermupolis neoklassik me’morchiligi va odatiy yunon kurortlaridan ko‘ra ko‘proq Italiya shaharchalarini eslatuvchi muhiti bilan mashhur.