Er xotin munosabatlari (davomi…)

Er – xotin munosabatlari oilani boshqarishda juda katta ahamiyatga ega. Bunday munosabat ota onaning bolalari bilan bo`lgan munosabatiga jiddiy ta`sir ko`rsatadi. Ota ona va farzand o`rtasidagi muloqot, bolaning ruhan tetiklik darajasi ko`p tomonlama oila boshliqlari o`rtasidagi munosabatlarga borib taqaladi.

Bundan shu narsa ma`lum bo`ladiki, o`z farzandi bilan yaxshi munosabatda bo`lishni istagan ota onalar birinchi navbatda o`zlarining o`rtasidagi munosabatlarini yaxshilamog`i shart.

Oilaviy munosabatlarning muvafaqiyatida otalarning roli juda katta. Har doim tashabbus ota yoki er tomonidan bo`lishi shart. Masalan bir erkak haqiqiy oila boquvchisi bo`lishi, uni hamma hurmat qilishi mumkin, ammo u oilada qanday?

Turmush o`rtog`i u bilan ochiq gaplasha oladimi? U xotiniga iliqlik va mehribonlik qila oladimi? Ba`zi erkaklar oiladagi munosabatlar haqida gaplashishni muhim deb hisoblamaydilar. Ular uchun turmush o`rtog`ining orzu umidlari, his tuyg`ulari gaplashishga arzimaydi. Ular faqat aniq dalillar va ma`lumotlar asosida ish ko`rishadi. Ammo bunday sovuq harakterli inson bilan yashash oson emas.

Oila ma`suliyatini bo`yniga olmagan er va ota oilani baxtli qila olmaydi. Xotin, ya`ni onaning oilada o`ziga yarasha ma`suliyati bor, ammo er har bir qadamda uni qo`llab quvvatlab turmog`i, unga ko`maklashmog`i lozim. Xotin ham o`z navbatida erining oilaviy hayotning hamma tomonlarida,ayniqsa ruhiy munosabatlarda ham uni 100% quvvatlashni xohlaydi.

Er zarur vaziyatlarda undan yordamini ayamasligi kerak. Xotinining unga yordamga tayyorligini , kerak bo`lganda oilani boshqarib turishini u hamisha his qilib tursin.

Butun ma`suliyatni o`z bo`yniga yuklab olgan va eri oila tashvishlaridan bo`yin tovlaydigan ayolning hayotini tinch va osoyishta, o`zini esa mehr muhabbatga qoniqqan deb bo`lmaydi. Erning oila uchun butun javobgarlikni o`z bo`yniga olishi xotini va farzandlari uchun katta baxt sanaladi.

Eridan muhabbat ko`rgan ayolgina mu`jizalar yaratishga qodir bo`ladi, o`ziga baxsh etilgan mehr muhabbatni turmush o`rtog`iga va farzandlariga ming bora orttirilgan holda qaytaradi,  oilasini sehrli bir yog`duga burkaydi.

Buning yagona sharti, tashabbus hamisha er tomonida bo`lishi lozim. Bunga qodir bo`lgan erkakka havas qilsa arziydi. Ayol tomonidan qaytarilgan sevgi bebaho sanaladi. Mening fikrimcha bu dunyodagi eng qimmatbaho narsadir. Tashabbusning er tomonida bo`lishi qiyin kechadi, ammo xotinidan javob hissini olgan va o`rtadagi muhabbatning kundan kunga ortib borayotganini sezgan er uchun bu holat doimo engil kechadi. Oila munosabatlarida erning ham xotinning ham o`z majburiyatlari bor. Bu haqdagi suhbatimizni yana davom ettiramiz.