OChLda 5 tur o`yin natijalari!

Adelaida Yunayted – Bunyodkor 0:0

Bugun Osiyo chempionlar ligasi 5 tur doira bosqichidagi o`yinlar bo`lib o`tdi. Bugun bizning uchta klubimiz bu davra o`yinlarida o`z o`yinlarini o`tkazishdi.

Birinchi uchrashuv Avstraliyaning Adelaida shahrida mahalliy “Adelaida Yunayted” va Toshkentning “Bunyodkor” jamoalari o`rtasidagi Osiyo chempionlar ligasi 5-tur doirasidagi uchrashuv bo`lib o`tdi.

Birinchi bo`lim davomida “Bunyodkor” futbolchilari to`pni ko`proq o`zlarida ushlab turishga muvaffaq bo`lishdi. Ammo raqib darvozasi oldida xavfli vaziyatlarni ko`p sodir eta olishmadi. Aksincha “Adelaida” jamoasi futbolchilari Nesterov darvozasi oldida juda xavli vaziyatlarni yuzaga keltirishdi. Ayniqsa, 21-daqiqada himoyachilarning pala-partishligidan so`ng avstraliyaliklar a`zosida gol kiritish uchun qulay vaziyat yuzaga kelgandi. Ammo u bu vaziyatdan unumli foydalana olmadi. Birinchi bo`limda darvozalar daxlsizligi saqlanib qolindi. Ikkinchi bo`limda “Bunyodkor” futbolchilari tashabbusni qo`lga olish maqsadida ko`proq hujumlar tashkil etishga harakat qilishdi.

Ikkinchi taymning yarmiga kelib “Adelaida” futbolchilari ham faqat himoyada o`ynash xavfli ekanini tushungan holda, oldinga o`ta boshlashdi. Ammo ularning hujumlarini ba`zan himoyachilar bartaraf etishgan bo`lsa, ba`zan darvozon Ignatiy Nesterov yaxshi harakat qilib, to`pni egallab oldi. O`yin oxirlariga kelib Mirjalol Qosimov bir qator yangi futbolchilarni maydonga tushirdi.

Shundan so`ng “Bunyodkor”ning hujumlari xavliroq tus ola boshladi. “Adelaida” darvozasi oldida bir qator qulay vaziyatlar yuzaga keldi. Ammo bunyodkor futbolchilari ulardan unumli foydalana olishmadi. Shu tariqa o`yin 0:0 hisobidaga durang bilan o`z yakuniga etdi.

Paxtakor – Al Ittihod 1:2

Toshkentdagi “JAR” stadionida Osiyo chempionlar ligasining 5-turidan o`rin olgan “Paxtakor” – “Al Ittihod” o`rtasidagi o`yin bo`lib o`tdi. Osiyo Chempionlar ligasi uchrashuvlari doirasidagi mazkur o`yinida 1:2 hisobi qayd etildi.

Avvaliga, mehmonlar futbolchisi Hazzoziy 60-daqiqada hisobni ochadi. Birin-ketin uyushtirilgan hujumlar natijasida “Paxtakor” ham 68-daqiqada javob to`pini kiritishga muvaffaq bo`ldi.

O`yin oxirlarida “Paxtakor” futbolchisi Egor Krimets maydondan chetlashtirildi. Shunga qaramasdan “sherlar” ishonchli o`yin namoyish etaverishdi.Ammo, qo`shib berilgan vaqtda arablar ikkinchi golni kiritdilar. Jarima zarbasi yo`llanganda Muhammad Abosaban boshi bilan darvozani ishg`ol etdi.

Endi “Paxtakor”ning taqdiri ko`p jihatdan “Al-Arabi” – “Baniyas” klublari natijasiga ham bog`liq bo`ladi.

Al Jazira – Nasaf 4:1

BAAning “Al Jazira” va Qarshining “Nasaf” klublari o`rtasidagi Osiyo chempionlari ligasining guruh bosqichi, 5-tur uchrashuvi bo`lib o`tdi. Unda mezbonlar yirik hisobda g`alaba qozonishdi.

Uchrashuvning 6-daqiqasida burchakdan uzatilgan to`pdan so`ng Jodir Bari hisobni ochgan edi. Birinchi bo`lim yakunlanganda ana shu tablo 4:0ni ko`rsatib turardi. Mezbonlar etakchisi Rikardo Oliveyra shu orada xet-trik qilishga erishdi. U bu gollarining ikkitasini penal`tidan urganini ham e`tirof etmoq lozim.Birinchi bo`limda barchasi hal etilgan edi, shuning uchun ham qolgan daqiqalar rasmiyatchilik uchun o`tdi, deyish mumkin. “Nasaf” o`tkazib yuborilgan to`rtta golga bir marta javob qaytarishga erishdi. Ilhom Shomurodov qarshiliklarning yagona goliga mualliflik qildi.

Shunday qilib, “Nasaf” Osiyo chempionlar ligasidagi navbatdagi mag`lubiyatini tan olishga majbur bo`ldi. Mayli, hechqisi yo`q, ishqilib, bu yilgi tajribalar kelgusi yilda asqotsa, bo`ldi…

Mana Osiyo chempionlar ligasi 5 tur bosqichidagi o`yinlar ham yakunlandi. Har doyimgidek bizning klublarimizning saralash bosqichiga chiqish imkoniyatlari boshqa jamoalarning o`zaro uchrashuvlariga bog`liq bo`lib qolmoqda. Mayli, nimayam qilaolardik, biz sabrlik bilan bu uchrashuv natijalarini kutib qolamiz.