«Bunyodkor» – O`zbekiston kubogi sohibi!

O`zbekiston kubogi Toshkentda qoladigan bo`ldi. «Bunyodkor» klubi o`z tarixida uchinchi marta O`zbekiston kubogi sohibiga aylandi.

Uchrashuv Toshkentdagi «Paxtakor» markaziy stadionida bo`lib o`tdi. Oldingi maqolamizda xabar berganimizdek, O`zbekiston kubogi final uchrashuvida Toshkentning «Bunyodkor» va Qarshining «Nasaf» klublari kubok uchun o`zaro kurash olib borishlari kerak edi. O`yinda toshkentlik futbolchilar 3:0 hisobida g`alaba qozonishdi.

Uchrashuvdagi barcha gollar birinchi bo`lim o`zida kiritildi. Gollarga Salomov, Murzoev va Karpenkalar mualliflik qilishdi. Aytish mumkinki, final taqdiri o`yin birinchi bo`limining o`zidayoq xal bo`ldi.

Eslatib o`tamiz, «Bunyodkor» klubi bu final o`yinida nafaqat O`zbekiston kubogiga, balki kelasi yili Osiyo Chempionlar Ligasida guruh bosqichida to`g`ridan-to`g`ri ishtirok etish xuquqiga ham ega bo`ldi. Sababi, OFK Ijroqo`mi 2013 yilgi Osiyo Chempionlar ligasida O`zbekistonga 2+1 ko`rinishida o`rin ajratgan edi.

Shunday qilib, O`zbekistondagi 2012 yilgi futbol mavsumiga rasman yakun yasab bergan O`zbekiston Kubogi finalida «Bunyodkor» g`alaba qozonib, o`z tarixida uchinchi marta O`zbekiston Kubogini qo`lga kiritdi.

Barcha «Bunyodkor» klubi futbolchilarini va murabbiylar shtatini ajoyib g`alaba bilan tabriklaymiz va kelgusi mavsumda klubga, u ishtirok etadigan barcha chempionatlarda omad tilaymiz!